Localización

(Ver en Google Maps)

Este é un peto de encrucillada e está situado no muro dunha vivenda.

Chama a atención a súa forma sinxela e policromada. Sempre adornado con flores e candeas acesas, o que evidenia a súa viveza entre a devoción da xente.

A súa contorna máis inmediata tamén está coidada, mesmo co solo preparado ao seu arredor.

Descrición

Ten un remate triangular coma o peto de ánimas de Caeiro , que lle dá ese aspecto de capeliña.

Tamén é de observar a decoración de arco de medio punto, rematado en cruz, que nos rememora a tradición viva do románico na arquitectura popular.

A inscrición que ten decorando o frontal di: “HERMANOS ACORDAHOS DE NOSOTRAS. AÑO DE 1785″

Destaca o cromatismo, contrastando entre o azul e a pedra pintada de branco. Este cromatismo acentúase a maiores coas flores que diariamente engalanan este templete. O conxunto salienta todo el sobre as paredes de tonalidades máis escuras das construcións adxacentes.

Ao achegarnos podemos ver un retablo de xeso policromado, dentro dun fornelo acristalado como protección.

A figuración está composta por un Ecce Homo e catro almiñas entre o lume debaixo del: simbolismo relixioso evidente de que Deus sofre polos pecados da humanidade e o ser humano sofre, á súa vez, polos pecados cometidos contra El.

O Ecce Homo é moi expresivo, dramático e ben traballado na forma e nas cores.

Vai atado e leva coroa de espiñas sangrante e unha cana na man dereita.

Máis información

Podedes acceder dende aquí a unha galería de imaxes.

Ruta dos petos de ánimas de Vigo

Se queredes percorrer a Ruta dos petos de ánimas de Vigo no voso navegador de Google Maps, premede na ligazón anterior.